Montascha dumbraders d’aua

Sin fundament digl artechel 38 dalla lescha davart il provediment d’aua installescha la vischnaunca ils dumbraders d’aua munconts en objects gia colligiai entochen sil pli tard ils 31 da december 2015. Pertuccai ein oravontut ils vischinadis da Cumbel, Lumbrein, Morissen e Vrin. Els vischinadis da Degen, Vella e Vignogn sco era els uclauns da Nussaus e Surin ein sulettamein baghetgs d’economia agricols sco era ulteriurs objects senza intent da habitar pertuccai. Tier ils apparats che vegnan installai setracta ei da dumbraders d’aua cun modul da func. Il stan dils dumbraders vegn legius ora automaticamein per func. Grazia a quella tecnologia eis ei buca pli necessari da haver access agl apparat resp. d’annunziar il stan dil dumbrader cun la carta consignada.

Installaziun dils dumbraders d‘aua

Naven dil settember entochen il december 2015 vegnan ils luvrers da vischnaunca ensemen cun las firmas sanitaras ad installar ils dumbraders. Ils proprietaris dils baghetgs vegnan contactai precedentamein. Per mintga object vegn per regla installau in dumbrader d’aua avon igl emprem distributur. Ha in object plirs conducts d’affluenza, vegn installau per mintga conduct in dumbrader d’aua. Igl ei impurtont da saver installar ils apparats senza impediments. Igl access al conduct d’affluenza sto esser garantius. Ils dumbraders d’aua restan en proprietad dalla vischnaunca.

Excepziun dall’obligaziun d’installar in dumbrader d‘aua

Excepi dall’obligaziun d’installar in dumbrader d’aua ein baselgias, baghetgs da cuolm/aclas, tegias da cuolm, buentadés ni spinas els cuolms/aclas sco era retratgas d’aua da baghegiar.

En vischnaunca dat ei differents objects che vegnan buca utilisai, ch’ein denton colligiai al provediment d’aua dalla vischnaunca e per part medemamein als implonts d’aua piarsa tschuffa. En emprema lingia setracta ei da clavaus vegls senza diever. Plinavon existan era entginas casas ch’ein buca habitadas dapi plirs onns. La suprastonza communala ha ponderau schebein l’installaziun d’in dumbrader d’aua ei commensurada en tals objects, seigi quei ord vesta dils cuosts d’installaziun sco era dil prighel da donns da scheltira vid il dumbrader.

L’executiva communala ha decidiu da dar als proprietaris dils objects la pusseivladad da sedecider per ina dallas suandontas variantas:

1) Installaziun d’in dumbrader d’aua
La taxa annuala d‘aua ed aua piarsa secumpona dalla taxa da basa sco era dalla taxa da diever tenor il consum d’aua registraus entras il dumbrader. Il tscheins annual pil dumbrader d’aua da CHF 25.00 vegn medemamein mess a quen.

2) Plumbar la lingia d’aua
Quella lavur sto vegnir exequida entras il survetsch tecnic dalla vischnaunca Lumnezia. La taxa annuala d’aua ed aua piarsa secumpona sulettamein dalla taxa da basa.

3) Interrupziun dalla colligiaziun d‘aua
Las installaziuns privatas da provediment d’aua ein d’interrumper dils implonts publics. La taxa annuala d’aua ed aua piarsa croda cumpleinamein. Sch‘igl object vegn pli tard puspei colligiaus als implonts da provediment d’aua, eis ei da pagar las contribuziuns per la colligiaziun al provediment d’aua sco era al provediment d’aua piarsa. Quellas vegnan calculadas tenor las prescripziuns per objects che vegnan colligiai per l’emprema gada. Las contribuziuns da colligiaziun pagadas pli baul vegnan buca scuntradas.

Facturaziun dallas taxas annualas d’aua ed aua piarsa

Per objects cun pliras habitaziuns e sulettamein in conduct d’affluenza resp. in dumbrader d’aua (p.ex. ina casa cun treis habitaziuns en cumproprietad ni en proprietad da condomini), succeda la facturaziun dallas taxas annualas d’aua ed aua piarsa sulettamein ad in’adressa da quen. La repartiziun dils cuosts denter ils singuls proprietaris dallas habitaziuns ei buca caussa dalla vischnaunca.

Dumbraders existents

Ils vischinadis da Degen, Suraua, Vella e Vignogn sco era ils uclauns da Nussaus e Surin disponan per gronda part gia da dumbraders d’aua. Quels dumbraders d’aua gia installai vegnan remplazzai ni cumpletai cun in modul da func en ina secunda etappa. Il leger giu il stan da quels dumbraders d’aua succeda pil mument sco usitau cun la carta d’annunzia che vegn consignada mintgamai la fin digl onn.

Informaziuns e damondas

Per damondas arisguard l’installaziun dils dumbraders d’aua resp. il sistem da leger giu las datas stat il menader dil survetsch tecnic, Mario Alig, 079 445 54 58 bugen a Vossa disposiziun. Per damondas concernent las leschas davart il provediment d’aua e la dismessa dall’aua piarsa stat l’administraziun communala, partiziun finanzas/persunal, 081 920 60 16 bugen a Vossa disposiziun.

Survetsch tecnic

Survetsch tecnic Lumnezia
Mario Alig
Caum postal 54
7144 Vella

+41 (0)79 445 54 58
mario.aliglumneziach