10.10.2017 , Suprastonza communala Lumnezia

Organisaziun dalla rumida da neiv unviern 2017/2018

La vischnaunca exequescha en emprema prioritad la rumida da neiv da vias e plazs publics. Per evitar impediments en connex cun quellas lavurs, ha la suprastonza communala fixau il suandont uorden:

  • Sin tuttas plazzas da fermada per ils autos da posta sco era sin vias publicas e passapeis vala in scamond permanent da parcar.
  • El vischinadi da Vella vala sco usitau duront il temps d’unviern in scamond ufficial da parcar la notg denter las 01:00 e las 07:00 uras per liung dalla via cantunala e da tuttas vias communalas sco era sin las plazzas ed il terren public. Ei dat la pusseivladad da prender a tscheins parcadis permanents a Dado la Val/Caplan senza limitaziun dil temps da parcar. Il formular da reservaziun ei d’anflar cheu.
  • Els ulteriurs vischinadis duei vegnir evitau en cass da nevadas da parcar vehichels sin plazs publics ed agl ur da vias che vegnan rumidas.


En secunda prioritad porscha la vischnaunca il survetsch da rumida per vias e plazs privats sut las suandontas cundiziuns:

  • Las lavurs succedan en connex cun la rumida dallas vias publicas encunter in’indemnisaziun pauschala da CHF 100 - 300 per object. La summa sedrezza tenor la dimensiun dalla surfatscha.
  • Lavurs per rumir neiv supplementarmein vegnan exequidas sin giavisch cun adossar als possessurs ils cuosts effectivs tenor las tariffas vertentas per maschinas e las tariffas ufficialas da lavur.
  • Plazzas, vias e tuts parcadis privats che dueien vegnir rumi entras la vischnaunca, ein da signalisar da mintga privat per evitar donns vid ils stabiliments. La vischnaunca Lumnezia surprenda negina responsabladad per eventuals donns.
  • Privats che vulan mantunar regularmein neiv agl ur da vias ni sin plazs publics astgan far quei sulettamein avon la rumida regulara da neiv e cun far in’annunzia corrispundenta all’entschatta digl unviern. Persuenter vegn ina pauschala da CHF 50 incassada. Autramein eis ei scumandau da fierer e deponer neiv da schischom privat sin vias publicas, passapeis, sendas e plazzas publicas.

Annunzias per rumidas da vias e plazs privats

  • Tgi che ha schau rumir igl onn vargau la neiv e giavischa vinavon la rumida, sto annunziar nuot. L’annunzia vegn surprida per il proxim unviern.
  • Tgi che ha schau rumir igl onn vargau la neiv e giavischa buca ina rumida pli, duei annunziar quei en scret entochen ils 3 da november 2017.
  • Tgi che giavischa da niev ina rumida per il proxim unviern, duei annunziar quei entochen ils 3 da november 2017. Il formular corrispundent ei d’anflar cheu. Tals che fan in'annunzia per la rumida da neiv ston metter a disposiziun in plaz per deponer la neiv. All'annunzia ei d'aschuntar in plan da situaziun ch'indichescha il liug da rumida ed il liug da deponer la neiv.
  • Las annunzias ein d’inoltrar all’administraziun communala Lumnezia, caum postal 54, 7144 Vella.


Il survetsch tecnic fa tut il pusseivel per garantir la segirtad sin las vias ed in bien survetsch d’unviern. En connex cun sias lavurs basegna ei toleranza da vischinas e vischins e capientscha che buca tut ils giavischs san vegnir adempli. Finamira ei da porscher in survetsch da basa en ina rama raschuneivla e cun cuosts mudests pils convischins.

Administraziun

Uffeci communal Lumnezia
Palius 32D
Caum postal 54
7144 Vella

+41 (0)81 920 60 00
infolumneziach

Uffeci da taglia

Uffeci da taglia Lumnezia
Palius 32D
Caum postal 54
7144 Vella

+41 (0)81 920 60 08
steueramtlumneziach

Uras da spurtegl

gliendisdis - venderdis
09.30 - 11.30 uras
13.30 - 16.30 uras

ni tenor cunvegnientscha