Publicaziun ufficiala

31.03.2020 , Stab directiv communal Lumnezia

Coronavirus (SARS-CoV-2) - 31.03.2020

Il stab directiv communal Lumnezia ei vegnius en funcziun ils 13 da mars 2020 per prender mesiras da prevenziun ella situaziun extraordinaria pervia dalla pandemia tras il coronavirus (SARS-CoV-2).

Mesiras da frenar la derasaziun dil virus

Quei virus caschuna ina malsogna dil lom ch’ei fetg contagiusa e prigulusa oravontut per las persunas pli veglias e gruppas da resca cun malsognas preexistentas ni cun in sistem d’immunitad fleivel.

La malsogna che vegn numnada COVID-19 ha entschiet en China ed ei sederasada enteifer paucs meins pigl entir mund, aschia ha ei era dau cass en Lumnezia. Cunquei ch’ei setracta d’in niev virus dat ei buca ina virola encunter quel. Il tractament serestrenscha alla mitigaziun da sintoms. Cass grevs ston vegnir tractai sin la staziun intensiva, per il solit cun ina respiraziun artificiala.

La derasaziun dil coronavirus sa buca vegnir impedida. Ella sto vegnir frenada urgentamein per ch’il diember da cass grevs survarghi buca las capacitads dallas staziuns intensivas els spitals svizzers. La suletta pusseivladad d’evitar in’infecziun ei da star a casa e restrenscher ils contacts cun autras persunas al pli necessari. Persunas saunas san era surportar il virus senza saver.

Las instanzas intimescha l’entira populaziun da surprender atgna responsabladad. Per limitar il diember da persunas grevamein malsaunas ed evitar ch’il sistem da sanadad vegn surcargaus, ein tuts obligai da setener vid las recumandaziuns dil Cussegl federal.

Restai a casa, oravontut sche Vus essas attempai ni malsauns. Dano, sche Vus stueis ir alla lavur e sch’igl ei buca pusseivel da far home-office; sche Vus stueis ir tier il miedi ni ell’apoteca; sche Vus stueis ir a far cumissiuns ni sche Vus stueis gidar enzatgi.

Ils sintoms dalla malsogna dil lom ein fetg variabels e buca specifics. Eventualmein ston las persunas infectadas mo tuoscher ni ch’ellas han mo febra. Sche la tuos ei accumpignada da febra ni da sintoms generals sco stauncladad e mal las musclas e giugadiras ei l’infecziun cun il coronavirus pli probabla, e cunzun sch’ei dat difficultads da trer flad.

Mesiras da protecziun

En cass da sintoms eisi da star a casa e buc ir en loghens publics. Las novas mesiras valan per tuts, la populaziun ed ils gremis professiunals. Ellas duein frenar la derasaziun dil virus. Ils mieds d’isolar sesez e l’atgna quarantena ein fetg impurtonts per che l’epidemia sederasi buc aunc dapli ella communitad.
Igl Uffeci federal dalla sanadad publica (UFSP) ha publicau las instrucziuns per isolar sesez en cass da febra e tuos, per l’atgna quarantena sco era las instrucziuns tgei che Vus dueis far e tgei che las persunas conviventas e cun contacts intims duein far, sche Vus veis in’infecziun dil coronavirus e Vus essas isolai a casa.

Prioritad ha la sanadad publica. Specialmein las persunas che rescan da vegnir grevamein malsaunas duein esser protegidas meglier dil niev coronavirus. Il niev coronavirus sa esser particularmein prigulus per las persunas da 65 onns ensi e per quellas gia affectadas d’autras malsognas. Cunzun persunas cun ina dallas suandontas malsognas ein periclitadas:

  • malsognas cronicas dils vaus respiratoric, p.ex. greva asma, COPD
  • hipertensiun arteriala (pressiun dil saung aulta)
  • diabetes, en spezial diabetes mellitus tip 2
  • fleivlezza dil sistem d'immunitad pervia malsognas e terapias che reduceschan l'immunitad
  • malsognas cardiovascularas (dil cor e circulaziun dil saung)
  • cancer

Tuts san contribuir alla protecziun respectond las reglas da higiena e da conduita dil UFSP.

  • Tener distanza d’autras persunas.
  • Lavar ils mauns regularmein e da rudien.
  • Desister da contact corporal - buca dar il maun, embratschar ni bitschar.
  • Da tuoscher e sturnidar duvrar in fazalet ni tener il cumbel dil bratsch avon bucca e nas.
  • Star a casa en cass da tuos e da febra per curar la malsogna.
  • Adina telefonar avon ch’ir tiel miedi ni ella staziun d’urgenza.

Igl UFSP ha publicau las recumandaziuns per la populaziun en tuts lungatgs naziunals:
https://bag-coronavirus.ch/

Informaziuns impurtontas tier il coronavirus ein accessiblas

  • sin la pagina d’internet dil cantun Grischun www.gr.ch/coronavirus
  • sco era sin la pagina digl Uffeci federal dalla sanadad publica UFSP www.bag.admin.ch
  • Infoline dalla Confederaziun tier il coronavirus, telefon +41 58 463 00 00 - ei occupada da tut temps

 

 

Administraziun

Uffeci communal Lumnezia
Palius 32D
Caum postal 54
7144 Vella

+41 (0)81 920 60 00
infolumneziach

Uffeci da taglia

Uffeci da taglia Lumnezia
Palius 32D
Caum postal 54
7144 Vella

+41 (0)81 920 60 08
steueramtlumneziach

Uras da spurtegl

gliendisdis - venderdis
09.30 - 11.30 uras
13.30 - 16.30 uras

ni tenor cunvegnientscha