Publicaziun ufficiala

29.07.2020 , Administraziun communala Lumnezia

Elecziuns dils organs communals per la perioda d’uffeci 2021 – 2024

Las elecziuns han liug ils 27 da settember 2020.

Las elecziuns dallas autoritads communalas dalla vischnaunca Lumnezia per la perioda d’uffeci 2021 – 2024 han liug ensemen cun las votaziuns federalas.

Las elecziuns communalas cumpeglian l’elecziun dil president communal, dalla suprastonza communala, dalla cumissiun da gestiun e dil cussegl da scola. Las elecziuns succedan tenor la procedura da maiorz. Ei vala il relativ pli.

La constituziun dalla vischnaunca Lumnezia regla il modus d’elecziun sco suonda:

Art. 10 Eligibladad

1.    Scadina persuna cun dretg da votar sa vegnir elegida en in’autoritad communala.

2.    El presidi communal ed ella suprastonza communala san mo persunas vegnir elegidas per las qualas igl ei stau publicau els organs da publicaziun dalla vischnaunca ina candidatura ni ina proposta d’elecziun tenor art. 13 e quei silmeins 14 dis avon il termin dallas elecziuns.

3.    Las ulteriuras autoritads communalas san vegnir elegidas senza ch’ei basegna ina candidatura ni ina proposta d’elecziun ni ina publicaziun ufficiala.

Art. 13 Candidaturas

1.    Candidaturas ni propostas d’elecziun per ina autoritad communala san vegnir inoltradas da mintga persuna cun dretg da votar entochen sil pli tard ils 31 d’uost 2020 en scret alla canzlia communala. Quellas han da cuntener il num exact dalla candidata ni dil candidat e sin tgei uffeci che la candidatura ni la proposta d’elecziun sereferescha.

2.    Mintga persuna cun dretg da votar sa inoltrar mo ina ga ina proposta d’elecziun. Ina proposta d’elecziun astga cuntener sil pli bia tons nums da persunas elegiblas, sco quei ch’ei ha uffecis vacants. Nums che survargan il diember maximal vegnan strihai dalla gliesta da sut ensi e da dretg a seniester.

3.    Per ch’ina proposta d’elecziun seigi valeivla, sto quella esser suttascreta dalla persuna che fa la proposta e dalla persuna che vegn proponida.

4.    La vischnaunca publichescha candidaturas e propostas d’elecziun ch’ein valeivlas dafertontier sin sia pagina d’internet per informaziun. Sil pli tard 14 dis avon las elecziuns vegnan las candidaturas e las propostas d’elecziun publicadas els organs da publicaziun dalla vischnaunca. Candidaturas e propostas d’elecziun che vegnan inoltradas memia tard, vegnan buca publicadas.

5.    Ina candidatura sa vegnir retratga tochen il termin dalla publicaziun ufficiala. Cul consentiment en scret dalla persuna proponida sa ina proposta d’elecziun medemamein vegnir retratga tochen quei termin.

Art. 38a Elecziuns en suprastonza communala

1.    Scadin vischinadi ha il dretg d’in sez en surpastonza communala. Sche negin candidat stat a disposiziun en in dils vischinadis vala sco elegius quei candidat d’in auter vischinadi che ha contonschiu egl entir perimeter il meglier resultat dils buca directamein eligi.

2.    Per l’elecziun ella suprastonzua communala basegna ei silmeins diesch vuschs valeivlas.

3.    Vegnan pli paucas persunas elegidas che quei ch’ei ha sezs vacants dat ei in secund scrutini. Candidaturas respectivamein propostas d’elecziuns da persunas dils vischinadis ch’ein aunc buca risguardai entras la garanzia da sez han la precedenza en relaziun cun las vuschs obtenidas. Plinavon valan las determinaziuns per las elecziuns ordinarias.

Persunas en uffeci che han buca demissionau, valan sco proponidas.

Administraziun

Uffeci communal Lumnezia
Palius 32D
Caum postal 54
7144 Vella

+41 (0)81 920 60 00
infolumneziach

Uffeci da taglia

Uffeci da taglia Lumnezia
Palius 32D
Caum postal 54
7144 Vella

+41 (0)81 920 60 08
steueramtlumneziach

Uras da spurtegl

gliendisdis - venderdis
09.30 - 11.30 uras
13.30 - 16.30 uras

ni tenor cunvegnientscha