Vischinadi Cumbel

L’emprema ga ch’il vitg da Cumbel ei vegnius numnaus en fuorma da documentaziun anflan ins egl urbari imperial che datescha digl onn 825. D’antruras senumnava il vitg denton “Cumble” che deriva dil num latin “cumulus” e munta biet ni dil plaid valetta che deriva dil num helvetic “cumula”.

Il vischinadi da Cumbel ha oz ina detg buna ed uliva mischeida cun menaschis purils, fatschentas da mistergners, stizun dil vitg, ustria, casa da vegls e da tgira, administraziun communala, e.a.v.. Grazia alla buna posiziun geografica sco era grazia ad ina buna e futuris-tica politica communala ei Cumbel sesvilupau ad in vischinadi cun relativamein bunas perspectivas. Ensemen cul vischinadi da Morissen ei vegniu realisau il center da scola, sport e cultura a Cuschnaus, la serenera e la megliuraziun dil funs. La buna posiziun geografica lubescha ad ina roscha persunas dad ir silla lavur els vitgs vischinonts entochen a Cuera, quei senza stuer midar domicil. Grazia a maschinas modernas produceschan ils 10 menaschis purils derasai agl ur dil vitg igl x-dubel da quei dils 25 tochen 30 menaschis purils da pli baul. Ils menaschis d’antruras, tut menaschis da grondas famiglias nua che tut vegneva aunc fatg a maun, naven dil segar tochen tier il mulscher. Cuntribuiu a quei svilup rasant dapi l’entschatta dils onns 70 han era meglieras metodas da producziun e surtut las arrundaziuns dil funs. Projects per migliurar l’infrastructura dil vitg seschavan realisar pli baul mo cun lavur cumina. Las pusseivladads finanzialas dil maun public e dils vischins eran pli che mudestas. Gronds e cars projects dad infrastructura ha il vischinadi saviu realisar dapi miez dils onns 70. Quei oravontut grazia alla ulivaziun da finanzas cantunala, allas grassas subvenziuns federalas e cantunalas, sco era grazia als sustegns generus da vischnauncas ed instituziuns da padrinadi dalla Bassa.

La structura dil vitg da Cumbel ha sco era en bia auters loghens duas fatschas. Dad ina vart il vitg baghegiaus duront tschentaners cun la baselgia parochiala e las capluttas, las bialas casas da lenn ornadas cun fluras, ils clavaus tipics da lenna rodunda. Da l’autra vart il vitg viviu cun ses rodund 250 habitonts che lavuran gi per gi e sediverteschan. La biala part veglia dil vitg ha ina historia ch’ei restada tochen cul gi dad oz, quei grazia ad ina renovaziun migeivla dalla substanza da baghegiar veglia. En connex cun la revisiun dalla planisaziun lo-cala ei vegniu scaffiu igl onn 1991 el quatier Lischeinas ina zona per indigens. En quella zo-na ha il vischinadi saviu porscher plazs da baghegiar per pliras famiglias indigenas. Igl onn 2001 ei vegniu aviert la zona da baghegiar si Crest la Geina. Sper casas da vacanzas ei vegniu construiu pliras casas da persunas e famiglias cun domicil en vischnaunca. Egl onn 2006 ei vegniu decidiu d’inzonar ina gronda parcella a Cuschnaus. Actualmein vegn realisau en quei quatier ina surbaghegiada cun 24 casas da vacanzas, quei sin basa privata. Duas casas cun ensemen 15 habitaziuns vegnan actualmein realisadas el quatier Lischeinas. Dapi igl onn 1987 ei vegniu construiu a Cumbel 52 casas novas resp. 85 habitaziuns novas. Tenor la statistica actuala vegn dumbrau a Cumbel total 200 habitaziuns. Da quellas ein la mesadad occupadas da persunas cun domicil en vischnaunca, l’autra mesadad surveschan agl intent da vacanzas.

Indirectamein ha Cumbel era saviu seprofitar dil svilup turistic. Il territori da skis Lumnezia-Sursaissa-Mundaun, il lag da far bogn a Davos Munts e la buna da reit da sendas da spassegiar ein impurtontas purschidas per il turissem. A Cumbel vegn purschiu in Vita-Parcours, ina plazza da picnic/grillar, ina plascheivla plazza da giug per affons, in’ustria, casas da vacanzas per giuvenils, per gruppas e per famiglias, ina biala reit da sendas da vi-andar e per velos da muntogna.

Administraziun

Uffeci communal Lumnezia
Palius 32D
Caum postal 54
7144 Vella

+41 (0)81 920 60 00
infolumneziach

Uffeci da taglia

Uffeci da taglia Lumnezia
Palius 32D
Caum postal 54
7144 Vella

+41 (0)81 920 60 08
steueramtlumneziach

Uras da spurtegl

gliendisdis - venderdis
09.30 - 11.30 uras
13.30 - 16.30 uras

ni tenor cunvegnientscha