Il mistregn ha diltutta fatg avegnir

La vischnaunca muntagnarda Cumbel ha ina detg buna ed ulivada mischeida denter menaschis purils, fatschentas da mistergners e posts da survetsch. Il pli grond patrun ei la casa da tgira e vegls cun ca. 35 plazzas cumpleinas. Plinavon ina scrinaria e lennaria cun 15 plazzas cumpleinas ed ina fatschenta da scaldament ed installaziuns cun sedia en vischnaunca. Medemamein cuntribueschan 11 autras interpresas pintgas a quella buna ulivaziun economica. Biars mistergners indispensabels d’antruras ein daditg svani ord vitg, aschia il pasterner, muliner, calger, cusunz e petgacrappa. Malgrat quella muria da mistregns ha la depopulaziun saviu vegnir frenada comensuradamein. Ina raschûn ei segir la buna posiziun geografica. Quella lubescha a ver 40 luvrers da dir sila lavur ella regiun vischinonta senza midar domicil. Dil svilup turistic ella vallada ha Cumbel mo saviu seprofitar indirectamein. Igl access alla regiun da skis Sursaissa-Mundaun-Lumnezia succeda da Vella anora. Era las purschidas da vacanzas e dil temps liber ein vegnidas construidas pli anen, aschia il lag da bogn ed igl indrez da Beachvolley a Davos Munts, mo lu era las plazzas da tennis, la signalisaziun dalla via da velo e da viagiar. Finanzialmein separticipeschan tuttas vischnauncas dalla vallada a quells projects. Sche las pernottaziuns selain tuttina cumparegliar cun quellas dallas vischnauncas situadas turisticamein meglier, lu ei quei dad attribuir a dus camps per giuvenils ed a zacontas paucas casas da vacanzas. Negina purschida turistica ha Cumbel denton tuttavia buc. Menziun merettan in bein frequentau Vita-Parcours, ina biala plazza da picnic ed ina plascheivla plazza da giug. L’iniziativa per quels indrezs ein tuts vegni da privats ni dallas uniuns.

Administraziun

Uffeci communal Lumnezia
Palius 32D
Caum postal 54
7144 Vella

+41 (0)81 920 60 00
infolumneziach

Uffeci da taglia

Uffeci da taglia Lumnezia
Palius 32D
Caum postal 54
7144 Vella

+41 (0)81 920 60 08
steueramtlumneziach

Uras da spurtegl

gliendisdis - venderdis
09.30 - 11.30 uras
13.30 - 16.30 uras

ni tenor cunvegnientscha