Progress empermetonts dils davos decennis

Igl onn 1975 ha la radunonza communala approbau ina nova planisaziun locala ed in uorden da baghegiar niev. El temps da conjunctura aulta denton han ils instruments da planisaziun adina puspei stuiu vegni adattai. All’entschatta dils onns 90 han ins scaffiu ina zona da baghegiar per indigens e per tals ch’ein vegni neutier cula finamira da secasar cheu. All’entschatta ha quella zona giu grondas difficultads. Mo che gest quei quartier niev a Lischeinas procurassi per in boom da baghegiar el ver senn dil plaid, quei havessen gnanc ils pli gronds optimists e promoters da quella zona ughegiau da semiar. Buc snegar san ins il fatg che l’architectura da quella zona ei fetg varionta ed ha els pli biars cass da far pauc nuot cun la tradiziun da baghegiar indigena. Quei fatg ha lu era procurau per vivas discussiuns. La statistica davischnaunca semuossa en mintgacass detg positive, buc il davos grazia alla zona Lischeinas. Novs impuls pil futur spetgan ins era dalla nova zona d’industria. Grazia alla buna posiziun geografica sco era grazia ad ina buna e futuristica politica communala ei Cumbel sesvilupau ad ina vischnaunca cun bunas perspectives. In vitg ch’ei prompts da mantener il vegl cumprovau, che sesiara denton era buc al niev ha negina raschu da mirar pessimisticamein egl avegnir. Quei era sche gronds pensums ein aunc sin rucca. Muort las midadas socioculturas ed economicas dils onns 80 ei la scola veglia vegnida transformada en in center communal cun canzlia, local da radunonzas e scoletta. Era la stizun dil vitg periclitada e la banca han survegniu cheu suttetg. La buna infrastructura ed il bien survetsch public ein era resultat dalla buna collaboraziun cun la vischnaunca vischinonta da Morissen. L’erecziun dil center da scola e cultura Cuschnaus, la construcziun dalla serenera, la megliuraziun e la fusiun dad uniuns muossan che la via encaminada ei la gesta. Cun quellas sligiaziuns surcommunalas han pliras vischnauncas dalla Lumnezia gia sligiau problems che las fusiuns da vischnaunca duessen zacu realisar. Pil mument ei la resistenza per quellas fusiuns grondas, era sch’il cantun tauscha bufatgamein. Era sch’il “fusionitis” ei semussaus ord vesta economica e finaziala sco caussa fatga, sche ei il spert local semussaus per in bienton pli ferms che quella unda da fusiuns.

Administraziun

Uffeci communal Lumnezia
Palius 32D
Caum postal 54
7144 Vella

+41 (0)81 920 60 00
infolumneziach

Uffeci da taglia

Uffeci da taglia Lumnezia
Palius 32D
Caum postal 54
7144 Vella

+41 (0)81 920 60 08
steueramtlumneziach

Uras da spurtegl

gliendisdis - venderdis
09.30 - 11.30 uras
13.30 - 16.30 uras

ni tenor cunvegnientscha