Vischinadi Lumbrein

Sche nus contemplein igl uoppen da nies vischinadi, savein nus constatar gia ord da quel ch’il vischinadi da Lumbrein vegn separaus dil Glogn che va tras nossa val. Cheutras essan nus partgi sin ina vart seniastra ed ina vart dretga dil Glogn.

Aschia anflein nus dalla vart dretga dil Glogn il vitg Lumbrein sco era ils uclauns da Sogn Andriu e Nussaus. Dalla vart seniastra schain ils uclauns Surin, Pruastg Dadens, Pruastg Dado e Silgin. Il pli vegl habitadi sin territori dil vischinadi da Lumbrein, Crestaulta sper Surin, datescha dalla fasa miez dil temps da bronz ed ha cuzzau entochen ca. 800 onns a.Cr.
Lumbrein ei documentaus per l’emprema gada egl urbari caroling sco “Villa Lamarine”. El temps medieval era Lumbrein la residenza dils signurs da Lumerins. Ils uclauns da Silgin, Pruastg, Surin, Farglix, Nussaus, Mulina e Curtinatsch eran habitai ca. naven dil 15avel tschentaner. Sogn Andriu ei vegnius colonisaus pli tard. Curtinatsch e Mulina ein morts ora entuorn il 1760 e Farglix entuorn il 1900.

Lumbrein dumbra oz aunc 25 menaschis purils, da quels ein 21 menaschis cun existenza cumpleina e 4 menaschis accessoris. Per cumparegliar: igl onn 1955 dumbrava nies vischinadi aunc 94 menaschis. Treis alps ein en possess da vischnaunca. Naven dall’alp da vaccas Staviala Vedra vegn il latg menaus tras ina pipeline entochen en cascharia a Lumbrein, nua ch’ei vegn fabricau caschiel da muntogna duront igl entir onn. Igl onn 2005 ei l’ovra da meglieraziun vegnida terminada e surdada al vischinadi.

Nossas fatschentas da mistergners, stizuns, ustrias, etc. occupeschan ca. 40 – 50 persunas. Naven dil 1979 entochen il 1989 ei vegniu erregiu ina surbaghegiada a l’entschatta dil vitg cun ca. 90 habitaziuns. Els davos 20 onns ei vegniu realisau da quei da 20 casas novas. Quei ha dau bia lavur als mistergners indigens.

Il vischinadi da Lumbrein ha saviu realisar ina gronda infrastructura, aschia ch’ils indrezs ein oz en in bien e modern stan. Entochen oz havein nus giu la honur d’astgar haver tschentau dus cussegliers guvernativs, numnadamein dr. J.B. Capaul e dr. G.G. Casaulta.

Nies vischinadi stema fetg la veta culturala. Quei muossa il diember da 11 uniuns. Per mintga uniun stattan localitads idealas a disposiziun. Ina gronda muntada ha la perdanonza da Lumbrein cun sia processiun imposanta, la quala vegn festivada mintgamai la secunda dumengia d’october.

En fatgs turistics ha il vischinadi da Lumbrein luvrau ensemen cun ils ulteriurs vischinadis lumnezians sco era cun Lumnezia Turissem. Ils davos onns han ins realisau bia sendas da spassegiar, rutas da bike, etc.

Administraziun

Uffeci communal Lumnezia
Palius 32D
Caum postal 54
7144 Vella

+41 (0)81 920 60 00
infolumneziach

Uffeci da taglia

Uffeci da taglia Lumnezia
Palius 32D
Caum postal 54
7144 Vella

+41 (0)81 920 60 08
steueramtlumneziach

Uras da spurtegl

gliendisdis - venderdis
09.30 - 11.30 uras
13.30 - 16.30 uras

ni tenor cunvegnientscha