Vischinadi Vrin

Las excavaziuns da Crestaulta a Surin dattan perdetga che nossa cuntrada ei gia stada populada el temps da bronz. Circa 500 onns a. Cr. ein pievels illirers immigrai en nossas muntognas. Da quei temps deriva carteivel il num Vrin, numnadamein dil vegl marcau Virunum en Kärnten che senumna oz Maria Saal. El secund e tierz tschentaner avon Cristus ein pievels dall’Italia dil nord semischedai cun il pievel resident. Entuorn il 13avel tschentaner ei Vrin vegnius influenzaus d’ina pintga colonia da Gualsers neu da Zervreila. Il num da Vrin ei documentaus l’emprema gada ils 6 da matg 1209 en ina brev da Papa Inocens ils III.

Entochen la fin dil 19avel tschentaner secumponeva Vrin dallas fracziuns 'Dadens' e 'Dado la Punt'. Ils dus vischinadis vevan agens dretgs da pastiras, d’alps, d’uauls e da pasculaziun cumina. Sper Vrin Vitg e Vrin Dado vegnan numnai ils 'Hofs' da Mons, Cons, Camadrein, Ligiazun, Foppa, Vilegn, Tgamanada, Camplun, Puzatsch, Pignola, Schareida, Vanescha e Blengias.

Il pli marcant ei Vrin vegnius influenzaus dil sid. Antruras ha in stretg contact regiu cun ils vischins dalla Val Blegn. Igl onn 1887 ei il vischinadi da Vrin vegnius colligiaus en da Glion cun la via cantunala e dapi lu s’orienteschan ins adina dapli en quella direcziun.

La Greina ei da vegl enneu stada impurtonta per Vrin. Entochen all’entschatta dil 20avel tschentaner ei il pass dalla Greina vegnius nezegiaus per il traffic da rauba e da biestga local. Suenter ein differents projects per ereger ovras electricas cun in lag da fermada el plaun dalla Greina stai en discussiun. Dapi il 1996 ei la Greina sut schurmetg dalla natira.

El decuors dils davos decennis ei Vrin daventaus enconuschents pervia da siu maletg intact dil vitg. Cun sensibilitad pil detagl ei in svilup da baghegiar d’aulta qualitad staus pusseivels. Igl ei vegniu dau gronda peisa alla formaziun architectonica dil niev e vegl el vitg. Quella via ei vegnida honorada d’ordeifer cun in tschuat premis, sco per exempel cun il premi Wakker, il premi ArgeAlp, SIA-Umsicht ni il premi europeic per in svilup durabel. Vrin vegn menziunaus pli e pli stedi sco model per in auter svilup el territori dallas Alps.

Per frenar la depopulaziun ha il vischinadi segirau terren da baghegiar per indigens. L’infrastructura communala ei vegnida messa en in bien stan ed entginas fatschentas han saviu fitgar pei entras exportar lavur da buna qualitad. La megliuraziun da funs ha levgiau considerablamein las cundiziuns dil puresser e sin iniziativa d’ina societad ei vegniu realisau ina mazlaria per elavurar ils products indigens e promover la vendita directa.

Dapresent sefatschenta Vrin cun quater projects che savessen vegnir realisai el futur. Quei ei l’utilisaziun dallas auas entadem la Lumnezia entras las Ovras electricas Zervreila; la commercialisaziun dall’aua da Patnein sco aua minerala; il Parc Adula che duei daventar il pli grond parc naziunal dalla Svizra; la Dimora Greina cun in edifeci per far vacanzas ed ina plattaforma per sviluppar concepts, ideas e products pigl avegnir.

Administraziun

Uffeci communal Lumnezia
Palius 32D
Caum postal 54
7144 Vella

+41 (0)81 920 60 00
infolumneziach

Uffeci da taglia

Uffeci da taglia Lumnezia
Palius 32D
Caum postal 54
7144 Vella

+41 (0)81 920 60 08
steueramtlumneziach

Uras da spurtegl

gliendisdis - venderdis
09.30 - 11.30 uras
13.30 - 16.30 uras

ni tenor cunvegnientscha