Challenge da viagiar

Dumengia, ils 22 da matg 2022 meinan la vischnaunca Lumnezia e Surselva Tourismus atras ina challenge da viagiar per pign e grond a caschun dil «Coop Gemeinde Duell» da schweiz.bewegt. Purschiu vegnan treis rutas da viagiar cun differentas lunghezias. Tier tuttas treis rutas dat ei la pusseivladad da scursanir il viadi. Il punct da partenza e finiziun per tut las rutas sesanfla tier la scola Lumbrein, Vigela 1B, 7148 Lumbrein. Leu han igl emprem tut las participontas ed ils participonts da s’annunziar per la ruta giavischada. Per motivs organisatorics ei il viadi d’entscheiver denter las 09.00 e 14.00 uras. Plinavon supplichein nus d’annunziar - sche pusseivel ordavon - per la challenge sil sistem da reservaziun da Surselva Tourismus ni cun num e prenum per e-mail sut info@lumnezia.ch ni per telefon sut 081 920 60 00. Secapescha che Vus saveis era s’annunziar il gi da viagiar direct el liug.

Suenter viagiar offerescha la vischnaunca Lumnezia a tut las participontas ed ils participonts ina tschavera en ni entuorn la casa da scola Lumbrein. 

Encurir ora saveis Vus denter las suandontas treis rutas - survesta:

•    Ruta da viagiar cuorta Farglix: Lumbrein - Sietschen - Farglix - S.Andriu - S.Gion - Curtinatsch - Punt Mulin -  Lumbrein
•    Ruta da viagiar mediocra Curschellas: Lumbrein - Gir Grond - Cuschaias - Schlareins - Pastg; naven da leu viagiar anavos a Lumbrein sin la medema via sco quella dall’entschatta.
•    Ruta da viagiar liunga Alp Staviala Vedra: Lumbrein - Punt Mulin - Plaun d’Urdein - Alp Staviala Vedra (museum d’alp aviert) - Parmischinas - Vallesa - Schlareins - Cuschaias - Gir Grond - Lumbrein

Sin plaz scola Lumbrein stattan paucs parcadis a disposiziun. Perquei supplichein nus da viagiar cul traffic public.

La finamira dalla challenge da viagiar ei da motivar la populaziun tier dapli moviment e da rimnar minutas da moviment «Bewegungsminuten» per la vischnaunca Lumnezia tier il Coop duel dallas vischnauncas. Dapli informaziuns tier il duel anfleis Vus sut www.coopgemeindeduell.ch. En cass da damondas tier la challenge da viagiar saveis Vus bugen s’annunziar sut 081 920 60 00.

Nus selegrein sin mintgina e mintgin che semetta sin via e prenda part alla challenge da viagiar.

Ed emblidai buca da tschaffar Vossas minutas da moviment «Bewegungsminuten» ell’app «Coop Gemeinde Duell» duront igl entir meins da matg 2022. Informaziuns anfleis Vus sut www.coopgemeindeduell.ch. Tier ina challenge naziunala saveis gudignar plirs premis.