«Coop duel dallas vischnauncas» dalla Svizra en moviment

Novitads

Naven digl 1. entochen ils 31 da matg 2022 vegnan «las pli sportivas vischnauncas dalla Svizra» encuridas. La vischnaunca Lumnezia prenda part per la secunda ga al duel. Ella sa quintar sil sustegn da Surselva Tourismus.
Per tgei vai ei? La vischnaunca cun las pli biaras minutas da moviment «Bewegungsminuten» vegn elegida sco victura. Prendei part e rimnai tontas minutas da moviment sco pusseivel e gidai la vischnaunca Lumnezia tier la victoria.

Co saveis Vus far quei? Ei dat duas pusseivladads co Vus saveis sustener la vischnaunca da rimnar minutas da moviment:

  1. Carghei giu l’app gratuita «Coop Gemeinde Duell» da schweiz.bewegt GmbH. Cun quella app saveis Vus naven digl 1. entochen ils 31 da matg 2022 tschaffar tut Vossas minutas da moviment ed aschia rimnar custeivlas minutas per nossa vischnaunca. Informaziuns detagliadas anfleis Vus sin www.coopgemeindeduell.ch.
  2. Prendei part alla challenge da viagiar «Wander-Challenge» en nossa vischnaunca. Ella ha liug dumengia, ils 22 da matg 2022. Il punct da partenza e finiziun sesanflan tier la scola Lumbrein. Vus saveis eleger denter treis differentas rutas da viagiar. Las descripziuns dallas rutas ed autras impurtontas informaziuns anfleis Vus sut www.lumnezia.ch, Surselva Tourismus e www.coopgemeindeduell.ch.

La vischnaunca Lumnezia e Surselva Tourismus selegran da biaras participontas e biars participonts. Mintga minuta quenta!