Elecziun cumplementara per in commember dil cussegl da scola

Publicaziuns ufficialas

Abdicaziun d’in commember dil cussegl da scola, Vischnaunca Lumnezia

A caschun dallas votaziuns ed elecziun cumplementara dils 13 da zercladur 2021 ei Renzo Blumenthal da Vella vegnius elegius en la suprastonza communala dalla vischnaunca Lumnezia.

Cun scriver dils 22 da zercladur 2021 eis el seretratgs per immediat sco commember dil cussegl da scola dalla vischnaunca Lumnezia.  

 

Elecziun cumplementara per in commember dil cussegl da scola

Demissiunescha ina persuna d'in uffeci el decuors dalla perioda d'uffeci per motiv da sanadad, midada da domicil ni per in auter motiv objectiv, eis ei da far in'elecziun cumplementara pil temps d'uffeci restont, sche la perioda d'uffeci currenta cuoza aunc dapli che nov meins. Per l'elecziun cumplementara valan las medemas prescripziuns sco per las elecziuns ordinarias.

La vischnaunca Lumnezia enquera novs candidads per l'elecziun dad in commember ni ina commembra per il cussegl da scola dalla vischnaunca Lumnezia per la perioda d'uffeci 2021-2024.

Entochen oz ein entradas neginas candidaturas tier la vischnaunca Lumnezia .

Persunas intressadas vegnan supplicadas d’inoltrar lur candidaturas aschi spert sco pusseivel en scret: Administraziun communala, Caum postal 54, 7144 Vella.

Sil pli tard 14 dis avon las elecziuns vegnan las candidaturas e las propostas d'elecziun publicadas els organs da publicaziun dalla vischnaunca.

L'elecziun cumplementara ha liug ensemen cun las votaziuns federalas dils 26 da settember 2021.