Lescha davart igl uorden public per la vischnaunca Lumnezia

Publicaziuns ufficialas

La suprastonza communala appellescha da setener vid ils artechels dalla Lescha davart igl uorden public. En special seigien menziunai:

Art. 8              Tener tgauns ella publicitad
1 Igl ei scumandau da schar ir tgauns senza survigilar els e da schar giappar els permanentamein el liber.
2 Igl ei scumandau da prender tgauns en baselgias e capluttas, santeris, salas publicas da concert ni localitads da semegliont gener. Excepiu da quei scamond ein tgauns da tschocs e tgauns d'assistenza.
3 En baghetgs dall'administraziun communala, sin areals da scola e da scoletta, sin plazzas da giug, implonts da sport e parcs publics sco era en menaschis da restauraziun ein ils tgauns da menar vid la tschenta cuorta. La suprastonza communala sa determinar ulteriurs areals, nua ch'igl ei da menar temporarmein ni permanentamein ils tgauns vid la tschenta.

Art. 21 Dis da ruaus
1 Sper il di dalla fiasta naziunala digl 1. d'uost valan ils dis da ruaus publics tenor Lescha dil cantun Grischun davart ils dis da ruaus publics (DG 520.100). Ils dis da ruaus locals ein:
1. S. Giusep
2. Sontgilcrest
3. Nossadunna d'uost
4. Numnasontga
2 Per ils dis da ruaus locals valan las disposiziuns dalla lescha cantunala conform al senn.

Art. 25 Immissiuns dall’agricultura e horticultura
[…]
2 Duront dis da ruaus publics e locals tenor art. 21 ein lubidas lavurs agricolas ch'ein dependentas dall'aura mo sch'ei smanatscha il prighel che la raccolta vegni svaletada ni ruinada.
3 Duront dis da ruaus publics e locals eis ei scumandau da trer grascha e puschina sco era da segar praus e pastgets.
4 Ventilaziuns da fein ein da sclauder duront il temps da ruaus da notg. La suprastonza communala sa lubir excepziuns.

Art. 33 Disposiziun penala e rom penal
Tgi che cunterfa intenziunadamein ni per negligientscha a quella lescha ni surpassa disposiziuns che sebasan sin quella vegn castigiaus cun ina multa da tochen 5’000 francs. En levs cass sa vegnir admoniu a bucca ni en scret enstagl da dar ina multa ni vegnir desistiu d'in castitg. Las disposiziuns penalas dil cantun e dalla confederaziun ein resalvadas.