Midada dalla procedura per damondas da contribuziuns e novs reglaments

Publicaziuns ufficialas

Midada dalla procedura per damondas da contribuziuns e novs reglaments

La vischnaunca Lumnezia sustegn uniuns e gruppaziuns d’interess cun contribuziuns finanzialas. Dad ina vart ein quei per uniuns indigenas las contribuziuns pauschalas annualas, da l'autra vart sustegns individuals per projects ed occurrenzas.

Ils 5 da fenadur 2021 ha la suprastonza communala decidiu d'instradar ina nova procedura per tractar las damondas da contribuziuns enten definir quater termins sin ils quals las damondas ston vegnir inoltradas alla vischnaunca. Quei ein ils 15 da mars, ils 15 da zercladur, ils 15 settember ed ils 15 da december. Las damondas vegnan tractadas mo sch'ellas entran tier l'administraziun communala ad uras enteifer quei termin. Autramein vegn la decisiun stuschada sil proxim quartal.

Plinavon ston ils organisaturs ch'inoltreschan damondas da contribuziuns, tut tenor grondezia dil project, era preparar in concept ed ei sto vegnir inoltrau in preventiv da project ed in plan da finanziaziun. Occurrenzas ni projects ch'ein planisai a liunga vesta dueien vegnir inoltrai ad uras per preexaminaziun, era sche la planisaziun ei aunc buca serrada giu. Quei duei simplificar il process da preparaziun pil preventiv, ton per las uniuns sco era per la vischnaunca Lumnezia.

Igl onn 2021 vala sco onn transitoric e damondas vegnan tractadas sco tochen dacheu. Cugl 01. da schaner 2022 va la nova reglamentaziun en vigur.

Damondas da contribuziuns ein d'inoltrar en scret per posta ni posta electronica: Vischnaunca Lumnezia, cumissiun da cultura, Palius 32D, 7144 Vella ni info@lumnezia.ch cugl avis "cumissiun da cultura".

Damondas inoltradas directamein tier commembers dalla suprastonza communala vegnan visadas anavos.

Reservaziuns da localitads e publicaziuns per occurrenzas

Reservaziuns da localitads san vegnir fatgas sur la pagina d'internet dalla vischnaunca: https://www.lumnezia.ch/rm/spurtegl-virtual/reservaziun-localitads.

Leu anfleis Vus era ulteriuras informaziuns, per exempel davart damondas per lubientscha d'ustria ed auter.

Occurrenzas che Vus annunzieis alla vischnaunca cul formular https://www.lumnezia.ch/rm/form/create-events vegnan era dadas vinavon alla Surselva Tourismus AG per publicaziun sin lur pagina. Publicaziuns el Fegl ufficial dalla Surselva ein caussa dils organisaturs.

Taxas per diever da localitads

Taxas per diever da localitads vegnan adossadas tenor Reglament per diever da stabiliments communals per la vischnaunca Lumnezia (217.110).

Ils reglaments dalla vischnaunca Lumnezia ein accessibels sut
https://www.lumnezia.ch/rm/spurtegl-virtual/legislaziun.