Procedura per damondas da contribuziuns

Publicaziuns ufficialas

La vischnaunca Lumnezia sustegn uniuns e gruppaziuns d'interess cun contribuziuns finanzialas. Sper las contribuziuns annualas allas uniuns indigenas, ein quei sustegns individuals per projects ed occurrenzas.

Damodas da sustegn per projects vegnan tractadas dalla cumissiun da cultura ina ga per quartal. Ellas ein d'inoltrar mintgamai sils 15 da mars, 15 da zercladur, 15 settember e 15 da december. Damondas ch'entran pli tard vegnan stuschadas sil proxim quartal.

Plinavon ston organisaturs ch'inoltreschan damondas da contribuziuns aschuntar in preventiv da project ed in plan da finanziaziun. In muster ei d'anflar silla pagina d'internet dalla vischnaunca.

Occurrenzas ni projects ch'ein planisai a liunga vesta dueien vegnir annunziai ad uras per preexaminaziun, era sche la planisaziun ei aunc buca serrada giu. Quei duei simplificar il process da preparaziun pil preventiv, ton per igl organisatur sco era per la vischnaunca.

Damondas da contribuziuns ein d'inoltrar en scret per posta ni per e-mail: Vischnaunca Lumnezia, cumissiun da cultura, Palius 32D, 7144 Vella ni info@lumnezia.ch cun la remarca "cumissiun da cultura". Damondas a commembers dalla suprastonza communala vegnan visadas anavos.

Taxas per diever da localitads:
Vegnan las localitads duvradas per in intent che pretenda ina taxa da diever tenor Reglament per diever da stabiliments communals per la vischnaunca Lumnezia (217.110), san damondas per relaschar la taxa vegnir inoltradas.

Quei ha da succeder en fuorma dad ina damonda da contribuziun da silmeins la medema altezia sco la taxa che vegn applicada. Quella procedura survescha alla transparenza dallas cudischaziuns ella contabilitad communala.

Mauncan ils documents necessaris, vegnan contribuziuns refusadas.

Tut las leschas ed ils reglaments dalla vischnaunca Lumnezia ein accessibels sut
https://www.lumnezia.ch/rm/spurtegl-virtual/legislaziun.

Cumissiun da cultura dalla vischnaunca Lumnezia