Tener tgauns ella publicitad

Publicaziuns ufficialas

Tier l'administraziun communala Lumnezia entran adina puspei annunzias ch'ei vegni schau ir tgauns libramein e senza survigilonza. Per quei motiv fagein nus attents sin la (Lescha davart igl uorden public per la vischnaunca Lumnezia 111.100):

Art. 8   Tener tgauns ella publicitad

1 Igl ei scumandau da schar ir tgauns senza survigilar els e da schar giappar els permanentamein el liber.

2 Igl ei scumandau da prender tgauns en baselgias e capluttas, santeris, salas publicas da concert ni localitads da semegliont gener. Excepiu da quei scamond ein tgauns da tschocs e tgauns d‘assistenza.

3 En baghetgs dall‘administraziun communala, sin areals da scola e da scoletta, sin plazzas da giug, implonts da sport e parcs publics sco era en menaschis da restauraziun ein ils tgauns da menar vid la tschenta cuorta. La suprastonza communala sa determinar ulteriurs areals, nua ch‘igl ei da menar temporarmein ni permanentamein ils tgauns vid la tschenta.

4 Tgauns che mordan e muntan in prighel astg’ins schar liber mo cun buccari cumpleinamein segir. Per tgauns che mulestan tras in cumpurtament nausch e disgustus enviers la generalitad sa la suprastonza communala disponer ch’els vegnan eliminai senza indemnisaziun al possessur.

5 Possessurs e menaders da tgauns han da procurar ch‘ils excrements da tgaun sin terren public e terren privat da tiarzs vegnien allontanai immediat e conform agl uorden.

 

Medemamein ei d'observar l'Ordinaziun per la protecziun dils animals RS 455.1 OPAn.