Damonda d’approbaziun dalla concessiun per il project «Conduct da transmissiun Lumnezia» da las Ovras electricas Zervreila SA (supplement tier la damonda d’approbaziun dalla concessiun dils 25 da zercladur 2012), vischnauncas da Panaduz, Flem, Lumnezia, Val Stussavgia, Schluein, Tumein, Trin, Val S. Pieder, Ilanz/Glion e Sagogn
Las Ovras electricas Zervreila SA (OEZ) e las vischnauncas concessiunaras damondan per l’approbaziun dalla concessiun concernent la realisaziun dil project «Conduct da transmissiun Lumnezia». Las OEZ e las vischnauncas concessiunaras damondan da saver cuntinuar cun la procedura d’approbaziun dalla concessiun tenor la damonda dils 25 da zercladur 2012 (en il senn dalla decisiun da refusa dil Tribunal federal dals 12 d'october 2016; 1C_526/2015 ed 1C_528/2015 = DTF 142 II 517).
Cun la damonda d’approbaziun dalla concessiun dils 15 d'october 2025 vegn dumandau per l’approbaziun dalla concessiun sco er tut las permissiuns necessarias per realisar il project (coordinaziun e concentraziun dalla procedura tenor igl art. 55 LDAG).
Temps d'exposiziun e loghens d'exposiziun:
L'exposiziun publica ha liug dils 22 da schaner 2026 entochen ils 20 da fevrer 2026, tenor ils art. 52 ss. dalla Lescha davart il dretg dallas auas dil cantun Grischun (LDAG; DG 810.100).
La damonda d’approbaziun dil project menziunau en il tetel ei exponida publicamein en il center administrativ Sinergia, Ringstrasse 10, 7001 Cuira (s'annunziar tier la recepziun, 081 257 50 55). Dils documents d'exposiziun san ins prender investa duront las uras da biro ufficialas. Ils documents dalla damonda ein plinavon exponi tier las vischnauncas da Panaduz, Flem, Lumnezia, Val Stussavgia, Schluein, Tumein, Trin, Val S. Pieder, Ilanz/Glion e Sagogn.
Ils documents stattan ultra da quei era a disposiziun en fuorma electronica sin la pagina d'internet digl Uffeci d'energia e da traffic dil Grischun sut la rubrica «Aktuelles».
Exposiziun coordinada cun adattaziun dil Plan directiv «Conduct da transmissiun Lumnezia»
Il supplement dalla concessiun vegn exponius publicamein en coordinaziun cun l'exposiziun publica dil Plan directiv (art. 4 dalla Lescha federala davart la planisaziun dil territori [Lescha davart la planisaziun dil territori, LPT; CS 700] ed art. 7 dall'Ordinaziun davart la planisaziun dil territori per il cantun Grischun [OPTGR; DG 801.110]). Ils documents d'exposiziun san vegni consultai sin la pagina d'internet digl Uffeci per il svilup dil territori (www.are.gr.ch sut «Actualitads» ed «Exposiziun publica»). Analog alla damonda d'approbaziun dalla concessiun ein ils documents stampai medemamein exponi en igl edifeci administrativ Sinergia ed en las vischnauncas numnadas survart.
Protestas en scret
Tgi ch'ei pertuccaus dall'exposiziun e sa far valer in interess dign da protecziun vid la realisaziun, la impediziun ni la midada dil project (art. 53 en cumbinaziun cun igl art. 54 LDAG), ha il dretg da far protesta encunter il project, e quei en scret e cun ina cuorta motivaziun. Il dretg da far protesta han plinavon quels ch’ein autorisai tenor il dretg federal.
Las protestas en scret ston vegnir inoltradas enteifer il termin d'exposiziun entochen sil pli tard ils 20 da fevrer 2026 (bul postal) al Departament d'infrastructura, energia e mobilitad dil Grischun, Ringstrasse 10, 7001 Cuera.