Provediment d'aua e dismessa d'aua piarsa

La vischnaunca eregia ed administrescha in agen provediment d’aua. Quel cumpeglia tschaffadas d’aua, reservuars, conducts dil provediment d’aua e reits da hidrants, pumpadis, indrezs da stizzar fiug e fontaunas publicas. 

Era per la dismessa dall’aua piarsa procura la vischnaunca ils implonts necessaris. Ei setracta da sereneras, conducts d’aua tschuffa e conducts d’aua da plievgia sco era indrezs per scargar auas grondas.

Per saver finanziar igl entir provediment d’aua e la dismessa dall’aua piarsa incassescha la vischnaunca taxas annualas e contribuziuns da colligiaziun. Dapli informaziuns tier las taxas annualas e las contribuziuns da colligiaziun anfleis Vus cheu.

Dumbraders d’aua
Text

Dapi fin 2015 ei vegniu installau dumbraders d’aua tier tut ils objects colligiai vid il provediment d'aua. Tier ils apparats setracta ei da dumbraders d’aua cun modul da func. Il stan dils dumbraders vegn legius ora automaticamein per func. Grazia a quella tecnologia eis ei buca pli necessari da haver access agl apparat resp. d’annunziar il stan dil dumbrader cun la carta consignada. 

Facturaziun dallas taxas annualas d’aua ed aua piarsa

Per objects cun pliras habitaziuns e sulettamein in conduct d’affluenza resp. in dumbrader d’aua (p.ex. ina casa cun treis habitaziuns en cumproprietad ni en proprietad da condomini), succeda la facturaziun dallas taxas annualas d’aua ed aua piarsa sulettamein ad in’adressa da quen. La repartiziun dils cuosts denter ils singuls proprietaris dallas habitaziuns ei buca caussa dalla vischnaunca.

Informaziuns e damondas

Per damondas arisguard l’installaziun dils dumbraders d’aua resp. il sistem da leger giu las datas stat il menader dil survetsch tecnic, Mario Alig, 079 445 54 58 bugen a Vossa disposiziun. Per damondas concernent las leschas davart il provediment d’aua e la dismessa dall’aua piarsa stat l’administraziun communala, partiziun finanzas/persunal, 081 920 60 16 bugen a Vossa disposiziun.