Preschientscha
Nus essan presents a moda fidada e rinforzein ils giuvenils da sviluppar l'atgna responsabladad e l'atgna efficacitad.

Cuminonza
Nus promovin la cuminonza cun crear pusseivladads per relaziuns ed interess differents.

Scuntrada
Nus tractein ils giuvenils cun stema, a moda aviarta e conscient da nossa responsabladad.

La lavur da giuventetgna Lumnezia tgira il local da giuventetgna ch'ei enconuschents ella val sco Canorta e porscha mintga venderdis sera dallas 16:00 entochen las 21:00 in liug da sentupada aviert pils giuvenils en vischnaunca.

Il local da giuventetgna Canorta vegn tgirau da persunas dil fatg. Sper l'obligaziun da survigilonza surprendan las collaboraturas in'impurtonta rolla pedagogica: Entras motivaziun, interacziun e communicaziun sustegnan ellas ils giuvenils da purtar en lur basegns e da realisar atgnas ideas.

Cheutras ein ils davos onns naschi biars projects, programs ed ina lavur da giuventetgna activa. Stanzas ein vegnidas concepidas da niev, preits ein vegnidas coluradas, ina bar ei vegnida installada e novas pusseivladads da seser e star da cumpignia ein vegnidas construidas. Ils giuvenils han saviu cundecider co els vulan duvrar il spazi. Las menadras han pinau las vias per che lur ideas sappien vegnir realisadas el local da giuventetgna.

Era il cuschinar communabel ei in punct fix dil program il venderdis sera. Ils giuvenils mettan ensemen sezs lur menus e cuschinan per tut ils visitaders dalla stanza da giuventetgna. Silsuenter vegn magliau ensemen e fatg uorden. Cheutras emprendan ils giuvenils da surprender responsabladad per sesez e per lur concarstgauns.

Il liug da sentupada possibilitescha scuntradas, porscha divertiment senza squetsch da prestaziun ni consum. Ideas dils giuvenils vegnan pridas si e novs projects vegnan realisai communablamein. Plinavon vegn purschiu ina cussegliaziun per giuvenils, geniturs e persunas da referiment. Quella sa vegnir dumandada via WhatsApp ni e-mail.

In ambient che promova la sanadad vegn scaffius cun prender si activamein temas relevants per la sanadad el rom dalla prevenziun. Ils giuvenils vegnan susteni da sviluppar ina buna stima da sesez e d'anflar lur atgna via ella veta da carschi.

La lavur da giuventetgna ei presenta en vischnaunca ed informescha davart ils temas ed ils intents dils giuvenils. Ella possibilitescha ina colligiaziun constructiva denter giuvenils, instituziuns, commembers dallas autoritads sco era ulteriuras gruppas en mira. Aschia contribuescha la lavur da giuventetgna ad ina veta communala viva ed activa.

Dapi 2015 porta la vischnaunca Lumnezia il label «Vitg muntagnard amicabel per la giuventetgna». Quel distingua vischnauncas muntagnardas che s'engaschan a moda exemplarica pils interess d'affons e giuvenils. Giuvenils contribueschan activamein al futur dils territoris da muntogna, rinforzan lur svilup e fan cheutras frunt all'emigraziun.

Il label vegn surdaus dalla Gruppa svizra per las regiuns da muntogna (SAB). Ulteriuras informaziuns ein disponiblas sut las suandontas paginas-web:

www.sab.ch
www.jugend-im-berggebiet.ch
 

«Nus quitein ei grondius da veser ils singuls giuvenils che vegnan adina puspei a visitar la Canorta. Ina truppa cuntenta che passenta bugen temps ensemen, respectescha in l’auter, damogna ina ni l’autra sfida e crescha aschia ensemen.»

Cumissiun lavur da giuventetgna Ilanz-Glion e Lumnezia

• Hohl Michal Karin, presidenta, Ilanz-Glion
• Blumenthal Daniel, Lumnezia
• Collenberg Carla, Lumnezia
• Derungs-Loretz Marianne, Lumnezia
• Meier Goll Bernhard, Ilanz-Glion
• Gomes Couto Marianna, menadra

Cumissiun lavur da giuventetgna Lumnezia

• Derungs-Loretz Marianne, presidenta, Surcasti
• Blumenthal Daniel, Vella
• Blumenthal Giulio, Suraua
• Caduff Sarina, Cumbel
• Collenberg Carla, Lumbrein
• Weishaupt Chiara, Degen