L’uniun da commerci e mistregn Lumnezia ei vegnida fundada igl onn 1979 ed unescha tut las interpresas dil mistregn, dil commerci, dalla gastronomia e da tut ils menaschis da survetsch en Lumnezia. Actualmein dumbra l'uniun rodund 60 commembers. L’uniun agescha politicamein neutral e persequitescha sulettamein interess dall’economia.
Dapli informaziuns dall'uniun da commerci e mistregn Lumnezia e la gliesta dallas interpresas anfleis Vus cheu: www.lumnezialavura.ch
Promoziun dall'economia entscheiva cun qualitad da viver ella val. L'attractivitad da plazzas da lavur e dil spazzi da viver carmalan famiglias giuvnas e freneschan la depopulaziun.
L'uniun Cumbiniala Lumnezia ei vegnida fundada ils 22 da schaner 2021. Ella ha per finamira da filar ina reit da contacts ed in brat denter las differentas gruppas en mira, da promover il beinstar e la sanadad dalla populaziun sur tuttas generaziuns ora e da crear e promover in spazi da viver attractiv ella val.
L'anteriura casa dil miedi a Vella vegn a dar stuttetg a purschidas supplementaras allas structuras da famiglia e da scola ed ei vegn susteniu structuras ch'ein gia existentas per giuvenils e per seniors:
- meisa da miezgi pils scolars (existenta)
- canorta per affons pigns
- purschidas per affons e giuvenils
- promoziun e prevenziun dalla sanadad per seniors
- promoziun e prevenziun dalla sanadad da tuttas generaziuns
La Cumbiniala Lumnezia duei esser ina casa per tuttas generaziuns.
Ulteriuras informaziuns anfleis Vus cheu: www.cumbiniala.ch
La Cussegliaziun da geniturs ei ina purschida che sustegn las famiglias e che porscha ina cussegliaziun preziusa per mummas e babs, per tattas e tats sco era per persunas da referiment d'affons enfin 5 onns. Sche Vus haveis damondas davart il svilup, davart l'educaziun, davart il nutriment ni davart la sanadad da Vies affon ni en connex cun auters temas da famiglia - allura ei il team da cussegliaziun professiunal dalla Cussegliaziun da geniturs dil Grischun cheu per Vus. La purschida vegn finanziada dil cantun ed ei gratuita per Vus. La Cussegliaziun da geniturs dil Grischun ei buc’ affiliada ad'ina autoritad, ei denton suttamessa all'obligaziun da discreziun.
La Cussegliaziun da geniturs dalla Surselva ei cuntonschibla da gliendisdis enfin venderdis per telefon dallas 08.00 entochen las 11.00 uras.
Sche Vus vuleis discuorer cun ina cussegliadra da geniturs ni fixar in termin per in discuors, visitei nossa pagina d'internet Cussegliaziun da geniturs Surselva.
Contact:
Cussegliaziun per geniturs Surselva
Via Centrala 2
7130 Glion
+41 77 290 73 70
Il svilup regiunal vul rinforzar la cumpetitivitad dallas regiuns ruralas. La finamira ei d'augmentar la valur da nies territori per generar in svilup economic e procurar per plazzas da lavur.