Sco igl ei gia vegniu communicau en connex cun la revisiun dalla planisaziun locala dalla vischnaunca Lumnezia, ein era las cartas da prighel digl entir territori da vischnaunca vegnidas revedidas ed integradas el plan dalla cumissiun da prighel (zonas da prighel). Las lavurs corrispundentas ein vegnidas fatgas sut la bigetta dalla cumissiun da prighels digl Uffeci d'uaul e prighels dalla natira (UGP).
Las novas cartas da prighel ein avon maun e san vegnir consultadas sut Geoportal Kanton Graubünden (https://map.geo.gr.ch -> Thema Naturgefahren-Gefahrenkarte).
La revisiun dallas cartas da prighel ha per consequenza grondas midadas dalla valetaziun dils prighels, oravontut era enteifer il territori habitau. Aschia schai p.ex. Peiden cumpleinamein en ina zona da prighel considerabel, quei che corrispunda alla zona da prighel 1 (tgietschen). Igl entir territori da Cumbel ni era Vignogn schai niev ella zona da prighel moderau, quei che corrispunda alla zona da prighel 2 (blau).
Per mussar si e discutar il context ed ils motivs dalla valetaziun da prighel e las consequenzas pusseivlas, oravontut sin activitads da construcziun, organisescha la vischnaunca Lumnezia ensemen cugl Uffeci d'uaul e prighels dalla natira sco era cun l'Assicuranza d'edifecis (GVG) in'occurrenza d'informaziun per la populaziun.
Quella ha liug gievgia, ils 18 da settember 2025, allas 20.00 ella halla plurivalenta a Vella.
La populaziun ei cordialmein envidada da prender part a quell'occurrenza.
Publicaziuns ufficialas