Las vischnauncas da Breil/Brigels, Ilanz/Glion, Lumnezia ed Obersaxen Mundaun, che fuorman ina destinaziun turistica communabla, han introduciu igl 01. da schaner 2015 las leschas communalas e las ordinaziuns davart las taxas da hosps e las taxas turisticas. Quellas fuorman la basa per igl incasso dallas taxas da hosps e las taxas turisticas. Grazia allas entradas han las investiziuns turisticas pudiu vegnir augmentadas ils davos diesch onns. La purschida per ils hosps ei vegnida baghegiada ora. Quei va en favur da nos hosps, mo era dils indigens. Ils davos diesch onns ei denton era la carischia s’augmentada. La midada digl index naziunal dils prezis da consum (LIC) ha muntau dil mars 2014 entochen igl avrel 2025 totalmein plus 6.4%. Per che la purschida possi vegnir mantenida era vinavon sil nivel actual e sappi vegnir extendida aunc dapli, eis ei necessari d'ulivar la carischia.
Perquei ha la suprastonza communala Lumnezia decidiu d’augmentar las taxas da hosps ed il medem mument da harmonisar quellas sil nivel dallas ulteriuras vischnauncas dalla destinaziun turistica e plinavon d’adattar naven digl 01. da schaner 2026 igl art. 7 «taxaziun dalla taxa da hosps» sco suonda:
«Las tariffas per las singulas taxas da hosps e las differentas pauschalas ein las suandontas:
a. taxa da hosps 3.20 francs per pernottaziun
b. taxa da hosps messa a quen als alloschaders sco pauschala annuala:
1. hotels, per combra 475 francs;
2. habitaziuns da vacanzas, per meter quadrat dalla surfatscha da habitar netta 9.50 francs;
3. combras privatas, per combra 143 francs;
4. loschaments per gruppas, per plaz da durmir 63 francs;
5. campadis, per plaz 120 francs.
c. pauschala annuala obligatoria pil diever privat 8.50 francs per meter quadrat dalla surfatscha da habitar netta ed onn.»
La suprastonza communala Lumnezia