La Centrala naziunala d'alarm (CNA) digl Uffeci federal per la protecziun dalla populaziun (UFSP) fa mintg'onn sgols da mesiraziun aeroradiometrics per registrar la radioactivitad ord l'aria. Quels sgols surveschan d'ina vart per recaltgar datas da referenza, da l'autra vart per garantir la promtadad d'acziun dil team d'eroradiometria e da siu equipament.
Per la registraziun aeroradiometrica sgola in helicopter Super-Puma dall'aviatica svizra, equipaus cun in sistem da mesiraziun special, en rodund 90 meters altezia pliras gadas en vias parallelas sur il territori definiu. Per tener la grevezia da canera per la populaziun aschi bassa sco pusseivel vegn fatg ina pausa da sgol denter las 12:00 e las 13:30. Las acziuns han liug sil pli baul naven dallas 08:00 uras e sil pli tard entochen las 17:00 uras.
Ils 15 da zercladur vegn mesirau in territori entuorn il massiv dil Gottard. Ei suondan ils 16 da zercladur mesiraziuns ella regiun entuorn il lag da Zug, Baar, Wädenswil e Einsiedeln. El rom dil program da mesiraziun da standard per incumbensa digl Inspectorat federal per la segirtad nucleara ENSI vegnan ils 17 da zercladur fatgs sgols da mesiraziun da rutina el contuorn dallas ovras nuclearas Beznau (AG) e Leibstadt (AG), dil Zwilag e digl Institut Paul Scherrer PSI. La finiziun fan ils 18 da zercladur sgols da mesiraziun denter Schiers e Küblis sco era en dus territoris pigns: in denter Kreuzlingen e Weinfelden sco era in sper Rotbergegg.
Ils sgols da mesiraziun han liug per motivs da segirtad mo da bunas cundiziuns dall'aura. Eventualas adattaziuns dil plan da sgol vegnan publicadas sin la pagina d'internet dalla CNA (www.naz.ch).