Decret zona da planisaziun

Publicaziuns ufficialas
Planisaziun locala

Ils 8 da fevrer 2021 ha la suprastonza communala decidiu da prolunghir per dus onns la zona da planisaziun per igl entir territori communal ch’ella veva decretau ils 04 da mars 2019 sin basa digl art. 21 dalla lescha davart la planisaziun dil territori per il cantun Grischun (LPTGR). Il departament d’economia publica e fatgs socials dil Grischun ha approbau la prolungaziun.

Ils 06 da fevrer 2023 ha la suprastonza communala Lumnezia decidiu da prolunghir in'ulteriura ga il decret per ina zona da planisaziun dil territori communal. Il departament d’economia publica e fatgs socials dil Grischun ha medemamein approbau la prolungaziun.

La zona da planisaziun ha las suandontas finamiras:

a) Examinar ina reducziun dallas zonas da baghegiar (oravontut dallas zonas da habitar, mischedadas e da center) giud via ed agl ur dil territori surbaghegiau per la gronda part, conform allas prescripziuns digl art. 15 al. 1 e 2 dalla lescha federala davart la planisaziun dil territori (LPT) sco era dil plan directiv cantunal – habitadi (PDChant-A) dils 20 da mars 2018;

b) Realisar las ulteriuras prescripziuns digl art. 15 LPT sco era dil PDChant-A, specialmein per promover in svilup architectonic d'aulta qualitad dil habitadi viers anen ed ina renovaziun dil habitadi.

Ella zona da planisaziun astga vegnir realisau nuot che savess engrevegiar ni impedir la nova planisaziun ni esser cuntrari a tala. Projects da baghegiar astgan vegnir lubi mo, sch'els cunterfan buca allas planisaziuns e prescripziuns vertentas ni allas planisaziuns e prescripziuns novas prevedidas (art. 21 al. 2 LPTGR).

La suprastonza communala ha resalvau il dretg da concretisar da tut temps la zona da planisaziun respectivamein d'adattar quella conform al stadi da planisaziun mintgamai actual.

La zona da planisaziun vala entochen ils12 da mars 2025 e va en vigur cun la publicaziun hodierna.

Quest decret sa vegnir contestaus cun recuors da planisaziun tier la regenza, e quei enteifer 30 dis suenter la publicaziun ufficiala (art. 101 al. 1 LPTGR).

Dapli informaziuns anfleis Vus cheu.

Suprastonza communala Lumnezia